Myanmar sorkarin mi tang 9,000 chuang ngaidam

Myanmar President Win Myint chuan Myanmar New Year lawmna pualin tang 9,353 ngaihdam an nih thu a sawi a, an zingah hian ramdang mi 16 an tel. Tang ngaihdamte hi nimin khan jail aṭangin chhuah tir an ni.

Thuneitute chuan mi 9,000 chuang ngaihdam an nih bakah, jial-a tang dangte pawh ngaihdam an nih dawn leh dawn loh ngaihtuah mek a nih thu an sawi.

Myanmar New Year lawmna pual hian kumtinin tang eng emaw zat chu ngaihdam an ni ṭhin.

Nimina tang ngaihdam, chhuahte zinga hian politics thil avanga man mi pahnih an tel. Tang chhuah zinga 364 te chu sorkar sipai leh hnam bil helpawlte inbeihna thleng ṭhin duh loa nawrh huaihawt an mante an ni.

Hetihlai hian ngaihven hlawh tak, Reuters journalist pahnihte erawh chu ngaihdam zingah hian an tel lo. Reuters journalist-te hi sipaiten Rohingya Muslim 10-te an tihhlum dan an chhui laiin man an ni a, sorkar thuruk puangzarah puhin Official Secrets Act palzutah puh an ni. Kum sarih tang tura hrem an ni a, Yangon jail-ah dah mek a ni.