Manipur RO in CM Biren Singh hnenah show cause notice pe

Inner Manipur Par­liamentary constituency Returning Officer (RO), Naorem Praveen chuan Manipur Chief Minister Nongthombam Biren Singh chu Election Commission Model Code of Conduct bawhchhiaa puh a nih avangin show cause notice a pe.

N. Biren Singh hi Cong­ress candidate O. Nabakishore Singh chung­chang a sawinaah MCC bawhchhiaa puh a ni.

CM Biren Singh hi Nilaini hma ngeia insawifiah tura hriattir a ni a, mahse he thu ziah lai hian report tarlan a la ni lo thung. Mani­pur hian vawiin hian inner parliamentary consti­tuency-ah LS inthlan thawh hnihna an nei ang.

Congress candidate O. Nabakishore chuan CM lakah hian complaint thehlutin, March 29-a Imphal East district Yumnam Khunou-a BJP conference neihnaah mimal takin a bei niin a puh. CM thusawi chu in sawichhiatna a nih thu sawiin vote thlak turte rilru hruaikawi thei a ni, a ti.

Biren Singh hian chief secretary hlui Nabakishore dinhmun siksawi a nih chungchang sawiin thil dik loah a inhnamhnawih vang tih a sawi a, tuin nge mipui duh loh zawnga che chu vote duh ang tiin zawhna a siam zui a ni.

RO chuan District Election Office, Imphal East chuan hemi chung­changa report siam leh video footage-te chu a thehlut tawh tih sawiin video-ah hian puh a nihna chhan, a thusawi lai hi a lang tih a sawi.

Thawhlehni khan Nabakishore chuan state history-a a vawikhat nan CM hnenah MCC bawh­chhiat vangin show cause notice pek a ni tih a sawi a, thil zahthlak tak a nih thu a sawi bawk.

Manipur-ah hian BJP in sorkarna an siam velah khan tuna Congress candidate, khatih hunlaia state chief secretary Nabakishore chu sawn nghalin State Academy of Training director general-ah dah a ni. Hei hian nasa taka sawisel a hlawh a, sawn a nih hnu rei vak loah Nabakishore hian voluntary retirement a dil zui a ni.