Court-ah Israel PM a inlan
Israel prime minister Benjamin Netanyahu chu nimin khan eiruk thubuai a neih mekah Jerusalem district court-ah a inlan.
Court-a Netanyahu a inlan lai hian court pawn lamah amah thlawptu leh bang tura phuttu mi eng emaw zat an lo pungkhawm bawk. PM hi eiruk thubuai pathum siamsak a ni a, mahse an puhnaah hian tih dik loh a neih loh thu leh, politics lama a khingpuiten a hming tihchhiat tuma an beihna niin a sawi.
Netanyahu thubuaite hi case 1,000, case 2,000 leh case 4,000 tia sawi an ni.
Case 1,000 - Sumdawng liante hnen aṭangin dan kalhin thilpek, cigar leh champagne-te dawngah puh a ni a, hemi avangin heng mite hi thil a tih letsak nia puh a ni bawk.
Case 2,000 - Netanyahu hi Israel newspaper Yediot Ahronot chu amah leh a kaihhruai sorkar chungchang a ṭha lam hawia chhuah a nih chuan circulation lama an pun phahna tura puih a intiam nia puh a ni.
Case 4,000 - Minister of communication a nih lai leh PM a nih hnuah pawh a thuneihna dik lo taka hmanga puh a ni a, Bezeq telecom company Shaul Elovitch-a'n news site-ah a ṭha lam hawia a chungchang a puanzar chhan letna atan duhsakna hleihluak taka lantira puh a ni.
Netanyahu hi a thubuaiahte hian thiam loh chan tir a nih hma chuan tihsual nei lo anga ngaih la niin, prime minister office pawh a la luah chhunzawm reng thei a ni.
Thiam loh chan tir a nih pawhin a appeal leh thei dawn a, hemi chhung pawh hian PM hna hi a la chelh thei bawk ang.