Taiwan transport minister-in a ban tur thu a puang

Taiwan transport minister Lin Chia-lung chuan kar liam ta Zirtawpnia an ram khawchhak lam, Hualien khaw bula rel cheltusalna rapthlak tak thleng a, mi 50 an thih phahnaah mawhphurhna lain, minister a nihna aṭanga a ban tur thu Pathianni khan a puang.

Lin Chia-lung hian chetsualna thleng chungchanga mawhphurhna a lak thu hi a Facebook page-ah ziakin, chetsualna thlenna hmuna chhanchhuah leh chhawmdawl hna thawk zawhfel a nih hunah minister a nihna aṭang hian a bang dawn tih a sawi a ni. "He chetsualna thleng avanga sawiselna hrang hrang kan tawhte pawh ka pawm thlap a, kan lo thawk ṭha tawk lo a ni," a ti.

Hetih lai hian premier Su Tseng-chang office chuan Lin hian ṭawngkain minister a nihna aṭanga ban a tum thu pawh hi Premier hi a hrilh tawh a, mahse Su hian a ban tumna hi a hnawlsak rih niin a sawi.

Khualzin 500 vel phurtu rel hian Huelien khaw bula tunnel-ah a tlan laiin truck a su a, rel hi chesual zuiin a hma lam phei chu a chhe nasa hle. Truck hi kawng awih tak aṭangin rel kawngah a tla thla a, rel rawn tlan lai hmalam meter 250-ah a tla a, rel khalhtu hian a rel hi a tiding hman ta lo a ni.

Rel chetsual phahna, truck hmangtu constuction site manage Lee Yi-hsiang chuan he chhiatna thleng hi pawi an ti tak zet tih sawiin, prosecutor leh police-ten chetsualna thleng chungchang an chhuinaah pawh theihtawpa a thawhpui tur thu a sawi a, mipuite hnenah ngaihdam a dil nghal baw. Lee hi thu zawhfiah turin man a ni tawh bawk.