Indonesia-a cyclone tlehah mi 68 an thi

Indonesia-a East Nusa Tenggara province-a Pathiannia Tropical Cyclone Seroja tlehah mi 68 an thi a, midang 70 chu an awmna chin hriat a ni lo tih an ram National Disaster Management Agency chuan nimin chawhnu lamah khan an puang.

Cyclone tleh vang hian tui a len bakah lei a min nasa hle a, chuvang chuan chin hriat loha awm pawh an tam phah hle nia tarlangin National Disaster Management Agency thupuangtu Raditya Jati chuan thite chu East Flores, Lembata, Ende leh Alor-a mite an nih thu a sawi.

Chhiatna hi Pathianni zingah khan a tleng a, mi 15 an hliam bakah mi 2,600 vel laiin an tuar a, chenna in, kawngpui leh lei eng emaw zat a tichhia a ni.

Indonesia president Joko Widodo chuan chhiatna tawk chhungkuate chu a tawrhpui thu sawiin ministry hrang hrang- sipai, national police leh hmala thei dangte chu a rang thei ang bera chhawmdawl hna thawk nghal turin a hriattir.

An ram Meteorological, Climatology and Geophysics Agency chuan Indoneisa hmun ṭhenkhatah chuan ruahpui bakah thli na tak leh tuilian thleng pawhin a la thleng leh thei tih an puang bawk a ni.