Rohingya repatriation : May 3-ah Bangladesh leh Myanmar inbe dawn

Myanmar aṭanga Bangladesh rama Rohingya Muslim tlan­chhiate hruai kir an nih dan tur ngaihtuahin May 3 hian Nay Pyi Taw-ah Bangladesh leh Myanmar sorkar aiawhten mee­ting an nei leh dawn. Hei hi meeting an neih ṭum li-na tur a ni.

Bangladesh Foreign Minister Dr AK Abdul Momen chuan Myanmar security force-ten Rakhine state-a beihpui an thlak avanga an rama Rohingya Muslim tlanchhia, Cox's Bazar-a refugee camp-a awm mek mi nuai tel te hruai kir dan chu ngaihtuah a ni dawn tih a sawi. Prime Minister Sheikh Hasina pawhin Brunei a tlawh hunah raltlante hruai kir hna thawhna kawngah hian pui tura a sawm tur thu a sawi bawk. Bangladesh chuan ASEAN enpuina hnuaiah Myanmar ram chhungah safe zone siam a rawt tih a sawi bawk.

Nikum October thla khan Bangladesh leh Myanmar chuan raltlante hruai kirna tur hian inremna an lo siam tawh a, November thla aṭanga kalpui ṭan tura tih a ni. Mahse Myanmar lam hian Rohingya mite kirna tur hian an awmna hmunah boruak a la siamṭha tawk lo nia sawiin he hma lakna hi tihtawp leh rih a ni.

Momen chuan Myanmar hian Rohingya te hruaikir an nih tur thu chu vawi tam tak a tiam tawh a, raltlan hruai kir turte pawh ṭhenkhat chu enfiah tawh an ni chungin tun thlengin an la hruai kir thei lo tih a sawi. Hei bakah hian raltlante tan pawha kir an duh leh theihna turin boruak ṭha an la siam thei lo a ni, a ti.

Bangladesh-ah hian Rohingya raltlan hi nuai sarih vel an awm mek a ni.