Man a nih dawn vangin Peru president hlui a inkaphlum

Peru president hlui Alan Garcia chu eiruk chungchang chhuina kaihhnawihah Nilaini khan police-ten man an tum a, mahse man a nih hmain silaiin a inkaphlum.

Police-te chuan kum 69 mi, Alan Garcia hi man tumin Lima khuaa a inah an kal a, mahse an man hmain a lu-ah silaiin a inkap a ni. Damdawi-inah hruai nghal ni mah se an chhan thei ta lo a ni.

Eirua puhna chungchangah Garcia lakah hian arrest warrant tihchhuah a ni a, hei vang hian police-te chuan man an tum a, ni 10 chhung an hreng thei dawn a ni. Hemi chhung hian an puhna finfiahna te hi lakkhawm a ni ang. Mahse Garcia chuan thil tih dik loh a neih loh thu a sawi thung.

Garcia hi kum 1985-1990 leh 2006-2011 chhung khan Peru president a ni. Thuneihna a chan chhung hian Brazil construction company lian Odebrecht hnenah public works contract lian tak pein, hemi atan hian thamna sum tam tham tak a dawng nia puh a ni. Nikum November thla khan court chuan thla 18 chhung Peru ram chhuahsan lo turin hriattirna a lo pe tawh a, hei vang hian an rama Uruguay embassy-ah inhumhimna a dil a, mahse a dilna hi an hnawlsak a ni.

Social democrat, Garcia chuan an puhna hrang hrangte chu politics lama an beihna leh, tihchhiat an tumna niin a sawi. Thawhlehni khan bihruk emaw, tlanchhiat emaw a tum tawh dawn lo tih a sawi.