Sri Lanka Biak-in leh Hotel-ah bomb puak

Sri Lanka ramah nimin khan Easter Sunday puala inkhawm neih laiin Catholic biak-in pathumah bomb a puak a, Colombo khawpuia luxury hotel pathumah bomb tihpuah a ni bawk.

Bomb puak vanga thi hi he thu ziah lai thleng khan mi 207 an tling tawh niin Defence Ministry chuan a sawi a, rinhlelh thilah mi pasarih man an ni tawh a ni. Thi zingah hian ramdang mi 35 an tel a, hliam 300 chuang an awm bawk.

Bomb puahna biak-in te chu - Colombo-a Kochchikade district-a St Anthony's Shrine, Negombo-a St Sebastian's church leh Batticaloa-a Zion church te a ni. Hei bakah hian Colombo khawpui laili laia luxury hotel pathum - Cinnamon Grand, Kingsbury leh Shangri-La-ahte bomb hi tihpuah a ni bawk.

Colombo khawpuia St Antony's Shrine-ah bomb hi tihpuah a ni hmasa ber a, a hnu darkar chanve chhungin hmun dangah hian a puak zui a ni. Nimina pawikhawihna thleng hi eng pawl mahin an tih niin an la chhal lo.

St Sebastian church hi a chhe nasa hle a, he biak-inah hian bomb puak vanga thi hi mi 67 an tling. St Antony's Shrine beihnaah mi tam takin hliam an tuar bawk a, Batticaloa biak-in beihnaah mi 27 vel an thi bawk.

Police thupuangtu Ruwan Gunasekera chuan hliam tuarte hi damdawi-in hrang hrangah hruai nghal an nih thu sawiin, bomb puahna hmunte hi mipui tlawh theih loha khar niin chhui zui nghal a nih thu a sawi.

Cinnamon Grand hotel hi prime minister official resident bul hnaia awm niin, hotel restaurant-ah bomb hi tihpuah a ni a, mi pakhat a thi a ni. Bomb puahna hotel pathumte hi ramdang mi khualzin ten an pan nasat te an ni.

President Maithripala Sirisena chuan ramchhung hmun hrang hranga pawi­khawihna thleng chu a dem thu sawiin, mipui­te chu chiai lo tur leh, pawikhawihtute chhui hna thawhna kawngah thuneitute chu theihtawpa thawhpui turin a chah.

Prime Minister Ranil Wickremesinghe chuan nimin khan emergency meeting a ko nghal a, mi dawihzepte pawikhawihna thlen chu a dem tih sawiin, Sri Lanka mipuite chu hun hrehawm tak an tawh mekah chak taka awm tur leh inpumkhat turin a chah bawk a ni.

Finance Minister Mangala Samaraweera chuan nimina pawikhawihna hrang hrang thleng chu a hma aṭanga ruahman lawk vek nia a lan thu a sawi a, St Antony's Shrine tlawhtu Minister of Economic Reforms and Public Distribution Harsha de Silva chuan pawikhawihna thlen dan chu a rapthlak hle tih a sawi.

Pawikhawihtute hian hmundang pawh beih an la tum nia report a awm vangin police-te chuan mipuite chu chiai lo tur leh pawn chhuak tam lo turin an chah nghal.

Sri Lanka ram mipui tam zawk hi Buddhist niin, Catholic hi 6% vel chauh an awm a ni.

Police hotuin hriattir lawk

Sri Lanka police hotu Pujuth Jayasundara chuan nimina pawikhawihna a thlen hma ni 10, April 11 khan officer hrang hrangte hnenah intelligence warning pein, an ram chhunga biak-in lar tak takte chu thihchilh bomb tipuaktuten beih an tum tiin a lo hriattir lawk tawh a ni. Hriattirna a pekchhuahah hian foreign intelligence agency-te chuan National Thowheeth Jama'ath (NTJ) ten biak-in lar tak takte leh Colombo khawpuia Indian High Commission chu beih an tum nia an report thu a sawi. NTJ hi Muslim rorelna din duhtu pawl niin, nikum khan Buddhist lim hrang hrang an suasam avangin an pawl hming hian hriat a hlawh ṭan a ni.