Egypt President term pawhsei chungchangah mipui ngaihdan la

Egypt ram danpui siamṭhat a, President Abdel Fattah el-Sisi term kum 2030 thlenga pawh­sei rawt chung­chang­ah Inrinni aṭang khan mipui ngaihdan lak a ni a, ni thum chhung vote hi thlak theih a ni ang.

Kar kalta Thawhlehni khan Egypt Parliament chuan ram danpui siamṭhat rawtna hi alo pawm tawh a, he danpui siamṭhat rawtna hnuaiah hian President term hman mek, kum li term chu kum ruk-a pawhsei rawt a ni. Hei hi pawm a nih chuan Sisi hi kum 2030 thleng a president zui thei dawn a ni. Parliament-in rawtna hi a pawm hnuah ram mipuite ngaihdan hi an la ve leh a ni.

Hetihlai hian Egypt newspaper columnist lar tak Abdullah Al Sennawy chuan ram danpui siamṭhat tum hi an ram tan a hlauhawm thei dawn niin a sawi. Sorkar hnena thuneihna pek belhchhah tumna niin, ram danpui thlak danglam tum hian sorkar chak lohna a tilang zawk niin a sawi. Sorkar hian a hun neih hi a tawp hnai tawh tih hriain, hei vang hian hma an la ta nia a ngaih thu a sawi.

Parliament-a ram danpui siamṭhat rawtna ngaihtuahnaah hian assembly member 596 zinga member 554 an tel a, an zinga 531 chuan he rawtna hi an thlawp a ni.