Ukraine president thlan thawh hnihna nei

Ukraine President thlan thawh hnihna chu nimin khan neih a ni a, inthlan thawh hnihnaah hian actor Volodymyr Zelensky leh President ṭanglai Petro Poroshenko te an inbitum a ni.

An ram huna zing dar 8 aṭangin vote thlak ṭan a ni a, zan dar 8 thleng hawn a ni. Vote nei mi maktaduai 30.3 chuang an awm a, polling station 39,900 siam a ni. Inthlana venhim hna thawk tur hian law enforcement officer 130,000 duty tir an ni bawk.

Central Electoral Commission (CEC) chuan President thlan thawh hnihna neihpui hian ram 21 leh international organization 20 chuan observer 2,700 an tirh thu sawiin, inthlanna dik leh felfai taka kalpui a nih thu a sawi.

March 31 khan Presi­dent thlan thawh khatna hi neih a ni tawh a, candi­date zingah tling tura vote hmuh ngai zat, vote tla aṭanga 50% hmu pha an awm loh vangin vote hmu sang pahnihten inthlan thawh hnihna hi an hmachhawn leh a ni. Inthlan thawh khatnaah hian Zelensky chuan vote hmu sang berin 30.24% a hmu a, Poroshenko hian dawtin 15.95% a hmu a ni.

Inthlan thawh hnihna result hi May 1 hian CEC chuan a puang dawn a, June 3 hmain president thar hi lakluh a ni ang.