Kim Jong-un-a'n Putin-a lehkha thawn

North Korea ram hotu Kim Jong-un chuan kar kalta Zirtawpni khan Russia President Vladimir Putin chu lehkha thawnin, ram pahnihte inzawmna chu chak zawka siam a tiam.

Kim Jong-un hian tun thla chhung hian Russia tlawhin, Vladimir Putin nen hian meeting an nei dawn niin Russia Parliament, Kremlin chuan a sawi. Mahse a hun tak erawh a sawilang lo a, meeting an neih tur pawh a sawizau duh lo.

Hetihlai hian report ṭhenkhat chuan ram pahnih hruaitute hian tunkar hian Russia khawchhak lam, Vladivostok-ah summit hmasa ber an nei dawn niin an tarlang. Kim leh Putin-te hian ram pahnihte inlaichinna chungchang te, thawhdunna leh nuclear ralthuam tihtawp chungchangte an sawidun dawn niin Kremlin thupuangtu Dmitry Peskov chuan a sawi.

Peskov chuan Korean Peninsula aṭanga nuclear ralthuam tihbo a, boruak ralmuang leh muanawm siamna kawngah Russia chuan theihtawpa puih a inhuam reng a ni, a ti. Kim-Putin summit hmasa ber neihna tur hmun leh hun hi security lam venthawn thil avangin puanzar a la ni rih lo tih a sawi bawk.