Myanmar : Martarte hriatreng nan Yangon kawtthler rawng senin an theh

Myanmar sipai rorelna duh lohna lantira nawrh huaihawt mek, mipuite chuan sipaite kut tuara thi, ram tana nunna hlan­tute hriatrengna atan nimin khan Yangon khawpui chhunga kawtthlerte chu rawng sen an theh.

February 1-a sipai chakna hmanga civil sorkar rorelna hnehchhuh a nih aṭang khan mipuite chuan sipaite chet dan duh lohna lantirin khawpui hrang hrangah nawrh hi an la huaihawt chhunzawm reng a ni.

Association for Political Prisoners (AAPP) chuan thla hnih chhungin mipui sorkar tundin leh duha nawrh huaihawt zinga 570 vel chu sipaiten an kaphlum tawh tih sawiin, mi 3,500 vel man an ni tawh bawk niin a sawi. Sipaite hian an mi man ṭhenkhat chu chhuah ṭhen tawh mah se, an man zinga hmun ngaa ṭhena hmun li vel chu an la hreng chhunzawm zel tih a sawi.

Nimin zing khan mipuite hian Yangon khawpuia kawtthler, pavement leh bus stand-te rawng sena thehin thute an ziak a, an thu ziak ṭhenkhatah chuan sipaiten an tihhlumte thisen chu a la ro lo tihte a tel.

Internet Blackout
Sipaite hian nawrh huai­hawtte hi kawng hrang hrangin hrek an tum mek a, pungkhawmte an hnawhdarh bakah broadband wireless internet a titawp a, hemi hma hian mobile data service chu hun eng emaw chen a lo tihtawp sak tawh bawk.

Internet service hreksak an nih avangin mi tlemte chauhin social media lam pawh an khawih thei a ni. Nimin khan Mandalay khawpuiah pawh a ni hnihna atan hnathawktuten lungawi lohna an lantir chhunzawm a, gas mask vuah a, three-finger salute an pe lai thlalak ṭhenkhat hmuh tur a awm.

Nawrh huaihawtna thlawptu celebrity eng emaw zat manna tur thupek chu sipaite hian an tichhuak tawh bawk. Nimin khan comedian lar tak pakhat chu Yangon-ah man a ni.

ASEAN hruaituten meeting neih remti
Member ram 10 awmna, Association of Southeast Asian Nations (ASEAN) chuan Myanmar ram chhung buaina thleng mek chungchang sawihoa meeting neih an remti a, mahse meeting hun tur erawh an la ruat lo.

ASEAN hian member tam ber duh dangin an kal ṭhin a, mahse Myanmar sipaite chungchangah member ramte ngaihdan hi a in ang theih loh avangin hma an la thei rih lo a ni.