Putin-a'n President term dang a chelh theihna tur dan pawm

Russia president Vladimir Putin chuan President term hnih dang a chelh theihna tur dan siam chu Thawhṭanni khan a pawm.

He dan thar hnuaiah hian kum 68 mi, Putin hian kum ruk term, Russia President dinhmun hi term hnih dang a la chelh thei dawn a, kum 2036 thleng thuneihna a chelh chhunzawm thei dawn a ni. Ram danpui siamṭhatna pakhatah he dan thar telh hi President Putin chuan nikum khan a rawt a, July thla khan mipuite lak niin a tam zawkin an thlawp. March thla khan bill hi Parliament member-te chuan an pawm tawh bawk.

Dan thar hnuaiah hian President Putin hi tuna a zawna President term hnihna a hman mek a zawh hnuah pawh President hi a chuh leh thei dawn a ni. A term hi kum 2024-ah zo ang.

Putin hi a ṭum khatna atan kum 2000 khan Russia President-ah thlan tlin a ni a, hetih lai hian President term hi kum li niin a zawnin term hnih a chelh a ni. An ram danpui hnuaiah President dinhmun hi a zawnin term hnih bak chelh theih a ni lo. Kum 2008-ah a thawhpui Dmitry Medvedev chu President niin, Putin hi Prime Minister a ni thung.

Medvedev hian a President laiin President thar tur term chu kum li aṭangin kum rukah a pawtsei a, kum 2012-ah Putin bawk chu President ni lehin, kum 2018 inthlanah a chak leh bawk a ni. Eptu lam chuan dan siam thar hi nasa takin an sawisel a, hei hi Putin-a'n President dinhmun a chelh reng theihna tura a ruahmanna niin an puh.

Russia eptu hruaitu Navalny a dam lo
Russia eptu hruaitu, jail-a tang mek Alexei Navalny chu a dam loh avangin sick ward-ah dah a ni a, Covid-19 test pawh neih sak nghal a ni bawk.

Langsar taka President Vladimir Putin sawisel fotu, Navalny hian kar liam ta khan a tanna hmunah chaw ngheiin a nuar a ni. Navalny a hnungzang leh ke-a na a neih chu prison staff-te chuan an ngaihsak pui lo tih sawiin, a hmain a ward-ah chuan tuberculosis hri pawh a lo leng tawh niin a sawi bawk. Kum 44 mi, Navalny chuan a ward-a awm ve mi dang pathum chu TB vangin damdawi-inah dah luh an lo ni tawh a ni, a ti.