Sri Lanka-a bomb puak vanga thi 290 tling tawh

Pathianni-a Sri Lanka rama bomb puak vanga thi chu nimin tlai thleng khan mi 290 an tling tawh a, hliam tuar pawh 500 an chuang bawk.

Sri Lanka khawpui Colombo leh hmun danga bomb a puah hnuah hian ram pumah curfew puan a ni a, nimin zing khan hlih leh nghal a ni. Pathianni zan khan security force-te chuan Colombo airport bulah IED an hmu a, hei hi an sut nghal a ni.

Pawikhawihna kaihhnawihah hian rinhlelh thilah mi 24 man an ni tawh a, hetihlai hian eng pawl mahin bomb tipuaktu an nih thu hi an la sawi lo. Nimin khan school te chu khar vek a la ni a, pawikhawihna thleng kaihhnawiha thu dik tawk lo theh­darh tur venthawn thilah social media site tam tak khar a ni bawk.

Pathianni khan Easter Sunday puala inkhawm neih laiin biak-in pathumah bomb tihpuah a ni a, hei bakah hian Colombo khawpuia luxury hotel pathumah bomb a puak bawk. Police-ten pawikhawihtute an zawn lai hian hmun dang pahnihah bomb hi a puak zui leh a ni. Bomb puahna pakhat zawk hi Colombo chhim lama Dehiwala-a sahuan bulah a ni a, bomb pariatna hi Colombo-a Dematagoda district-ah puakin police officer pathum an thi tel a ni.

Sri Lanka-a pawikhawihna a thlen hma hian police hotu chuan pawikhawihna thlen tum a nih thu leh, officer te hnenah pawh warning a pe lawk nia sawi a ni. Hemi chungchang hi chhui chian a ni dawn tih sawiin, Prime Minister Ranil Wickremesinghe chuan amah leh minister-te pawh engmah hriattir an ni lo tih a sawi. Hemi rual hian an hna hmasa ber chu pawikhawihtute chhui chhuah a, man a nih thu a sawi bawk.

Ram hrang hrang hruaituten pawikhawihna thleng hi an dem thu leh, Sri Lanka an tuarpui thu an sawi. Pathianni zan khan Eiffel Tower pawh Sri Lanka tuarpuina lantir nan tih thim a ni.