Myanmar journalist-te appeal ngaihtuah dawn
Myanmar Supreme Court chuan vawiin hian sorkar thuruk kawla puha man, Reuters journalist pahnihten an chungthu ngaihtuah ṭha tura an ngenna chu a ngaihtuah dawn.
Reuters journalist pahnih - Wa Lone,33 leh Kay Soe Oo, 29, te chu Myanmar sipaiten beihpui an thlaknaa Rohingya Muslim 10 thah an nih dan chungchang an chhui laiin secrets law palzutah puh an ni a, kum 2017 December thla khan man an ni. Journalist pahnihte hi sorkar thuruk kawlah puhin, hei hi an ram himna atan a hlauhthawnawm thei dawn niin sorkar chuan a puh a ni.
March thla khan reporter pahnihte lawyer, Khin Muang Zaw chuan court-ah ngenna thehlutin, an puhna finfiahna tur a awm loh thu leh, man an nih theih nan police-ten an lo ruahman ru zawk niin a sawi. Nikum khan police pakhat chuan lower court-ah officer-te chuan reporter-te document zingah sorkar thuruk awmna hi an dah tel niin a lo sawi tawh bawk.
Nikum September thla khan Yangon-a district court judge chuan Official Secrets Act hnuaiah journalist pahnihte hi thiam loh chantirin kum sarih tang turin a hrem a ni. Journalist-te hian appeal mah se, January thla khan Yangon High Court chuan an appeal-na hi a hnawlsak a ni.