Sri Lanka : Bomb puaka thite sunna hun hmang

Sri Lanka rama bomb puak vanga thi te sunna hun chu nimin khan an ram pumah hman a ni.

Nimin thleng khan bomb puak vanga thi hi mi 310 an tling tawh a ni. Mitthite sunna hun hi an ram huna zing dar 8:30-ah hmangin, minute thum chhung ngawi rengin an ding a ni. Sorkar building hrang hrangah an ram flag chu a ngul chanveah zar a ni bawk.

Pathianni-a bomb puahna biak in pathumah pawh ṭawngṭaina hun hman a ni.

Police-te chuan pawi­khawihna thleng kaih­hnawihah hian mi 40 man an ni tawh tih an sawi. He pawikhawihna thleng hi eng pawl mahin an tih niin chhal lo mah se, investigator-te chuan an rama ISIS group, National Thowheeth Jama'ath (NTJ) chu an rinhlelh ber a ni a, ram pawn lam aṭangin puihna an dawng em tih pawh an chhui mek tih cabinet minister leh sorkar thupuangtu Rajitha Senaratne chuan a sawi.

Rajitha Senaratne chuan NTJ chu pawl lian lo tak an ni tih sawiin, Pathianni-a pawi­khawihna rapthlak leh liantham tak, ruahmanna fel tak hnuaia thlen chu an pawl mal mai chuan an tih theih a rinawm lo tih a sawi a ni.

President Maithripala Sirisena chuan Thawhṭanni zan aṭang khan ram pumah state of emer­gency a puang. He dan hnuaiah hian police leh sipaite chu special power pek an ni a, pawikhawihna thlenga inhnamhnawiha rinhlelhte chu court order awm kher loin an hreng thei dawn a ni. Thawhṭanni zan khan curfew puan a ni leh bawk a, mahse nimin zing khan an hlip leh nghal a ni.

Sri Lanka official-te sawi danin Pathianni-a bomb puak vanga thi zingah ram dang mi - British mi pariat, Indian pariat bakah Turkey, Australia, France, Japan leh Portugal ram mite pawh an tel tih an sawi. Interpol chuan pawikhawihna thlentute chhuina kawnga Sri Lanka pui turin investigator leh specialist-te a tir tawh a ni. Ram dangte pawhin an theih ang anga puih an inhuam thu an sawi bawk.