Mali PM thar atan Cisse ruat

Mali President Ibra­him Boubacar Keita chuan Thawhṭanni khan an ram prime minister thar atan finance minister hlui Boubou Cisse a ruat.

President office thuchhuah chuan PM atana ruat Boubou Cisse hi sorkar thar siam tura hriattir a nih thu a sawi bawk. Cisse hi sorkar hmasaah kum thum chhung finance minister a ni a, eng political party-ah mah a awm lo a ni.

Mali rama chi bing inkara buaina chhuakah Fulani hnam mi 160 dawn thah an nih avangin sorkarin sawisel a tawk nasa hle a, hnam hrang hrang inkara intihbuaina thleng ṭhinte veng tura hma la ṭha tawk loah puh a ni fo a ni. Hei vang hian kar kalta khan prime minister hlui Soumeylou Boubey Maiga leh a kaihhruai sorkar chuan banna an thehlut a ni. President chuan an banna hi pawmsak nghalin, civil society, eptu leh rorellai party hruaitute a biakrawn hnuah prime minister thar tur hi a ruat ta a ni.