Arab League-in Palestinian-te puih nan USD mtd 100 pe dawn

Arab League chuan Palestinian Authority ṭanpuina turin thla tin US dollar maktaduai 100 an pek tur thu a sawi.

Cairo-a meeting an neih zawh hnuah thuchhuah hi siamin, League chuan Palestinian-ten sum lama harsatna an tawh avangin state budget puihna turin Arab ramte chuan an pui dawn tih an sawi.

Israel chuan Palestinian Authority tan chhiah lo laksak ṭhinin hei hi thla tinin a transfer ṭhin a ni. Mahse sum a pek ṭhin hi PA chuan Israel mite an beih avanga jail-a tang mek, Palestinian mite ṭanpuina atan a hmang ṭhin nia puhin February thla khan a chhiah lakkhawm sak, dollar maktaduai 138 chu a transfer duh lo a ni. Hei vang hian Palestinian ram hian sum lamah harsatna a tawh phah a ni.

Qatar chuan Thawhṭanni khan Palestinian-te tan Gaza Strip-ah prosthetic hospital hmasa ber leh disability rehab centre a hawng bawk. Hospital hi Qatar lal hlui hming chawiin Hamad Hospital tih a ni a, khum 100 awmna a ni. Qatar hian kum 2012-ah khan, khatihlaia an lal -Emir Hamad bin Khalifa Al Thani-an Gaza a tlawh ṭumin hospital din hi a lo rawt tawh a ni. Hospital sakna leh relief project dang thawhna tur hian US dollar maktaduai 400 chuang a pe a ni. Gaza hi Gaza Strip-a rorel lai, Hamas pawl thlawptu a ni a, hetihlai hian US leh European Union te chuan Hamas hi firfiak pawlah an puang thung.