NZ mosque beih thungrulhna a ni : Sri Lanka minister

Sri Lanka Defence Minister Ruwan Wije­wardene chuan Easter Sunday-a an ramchhung hmun hrang hranga bomb puak vanga mi tam tak thihna thleng chu March thlaa New Zealand-a mosque-a Muslim-te beih an nih thungrulhna nia a lan thu a sawi.

Ruwan Wijewardene hian he thu hi Parliament-ah a sawi a, mahse in­formation hi khawi aṭanga an hmuh nge tih erawh a sawilang lo.

March 15 khan New Zealand-a Christchurch khuaa mosque pahnih beih a ni a, mi 50 an thi a ni.

Sri Lanka-a biak-in leh luxury hotel-a bomb puah vanga thi hi an la punbelh zel a, nimin thleng khan thi zat hi mi 359 an tling tawh.

Islamic State of Iraq and the Levant (ISIL) chuan Sri Lanka-a pawikhawihna thleng hi an pawl tih niin an chhal a, mahse finfiahna erawh engmah an ti lang lo. Hetihlai hian Sri Lanka thuneitute chuan he pawikhawihna hi Muslim firfiak pawl hriat la hlawh vak lo, National Thawheeth Jama'ath (NTJ) tih niin an ngai thung a, rampawn lam aṭanga puitu an neih an ring bawk. NTJ bakah tualchhunga helpawl dang Jammiyathul Millathu Ibrahim (JMI) chu an inhnamhnawiha rin a ni bawk.

President Sirisena chuan defence force lam hotute chu thlak a tum tih sawiin, a hmain pawikhawihna thlen tum an awm thu information an dawng chungin an dang thei lo a ni, a ti. Ramdang aṭanga intelligence report dawngtu security official-te chuan engmah an hriattir ve lo tih sawiin, heng official-te lakah hian action lak a ni ngei dawn tih a sawi.