Egypt mipuiten President term pawhsei rawtna pawm

Egypt ram danpui siamṭhat rawtna chungchanga mipuite ngaihdan lakah vote thlaktu zinga 90% dawnin he rawtna hi an pawm. Danpui siamṭhat tumnaah hian President term pawhsei rawtna pawh telh a ni.

Egypt Parliament chuan danpui siamṭhat rawtna hi a lo pawm tawh a, hemi hnu hian ram mipuite ngaihdan an la ve leh a ni. Mipuite vote thlak nan hian ni thum chhung hun siam niin, kar kalta Inrinni aṭanga Thawhṭanni thleng khan vote hi thlak theih a ni. Hemi chhung hian vote nei mi maktaduai 61 zinga maktaduai 27 velin vote an thlak a ni. Mipuite hi danpui siamṭhat chungchangah 'Yes' emaw 'No' emaw tih chauhin an duhthlanna tur hi thlaktir an ni.

Danpui siamṭhat hnuaiah hian President term, kum li ni mek chu kum ruk-a pawhsei rawt a ni. Hei hi thlak danglam a nih chuan President ṭanglai, Abdel Fattah el-Sisi chuan kum 2024 inthlanah a chuh ve leh thei dawn a, kum 2030 thleng thu­neihna a chelh zui thei dawn niin election commission chuan a sawi.

Hetihlai hian international advocacy group pahnih - Human Rights Watch leh International Commission of Jurists chuan Egypt sorkar hnenah danpui siamṭhat tumna hi sut leh turin an ngen a, an ram chu mimal thuneihna hnuaia dahna kawng an siam niin an sawi.