Sri Lanka-a Catholic biak-in ten service titawp rih
Easter Sunday-a Sri Lanka-a Catholic biak-in pathuma bomb tihpuah a nih hnuah venhimna tihchangtlun a nih hma chuan ram chhunga Catholic biak-in zawng zawngte chu khar a, service pawh kalpui rih lo tura hriattir an ni.
Catholic puithiam pakhat chuan hemi chungchang hi sawiin, security force-te thurawn angin biak-in te chu khar an ni dawn a, mass pawh buatsaih a ni rih dawn lo tih a sawi. Sorkar official chuan biak-in hrang hrangah venhimna ṭha zawka kalpui mek a nih thu a sawi bawk.
President-in defence secretary leh police hotu bang turin ti
April 21-a pawikhawihna rapthlak tak thleng vang khan President Maithripala Sirisena chuan Defence Secretary Hemasiri Fernando leh IGP Pujith Jayasundara te chu banna thehlut turin a ti. Pawikhawihna thlen hma hian security hotute hian biak-in pawimawhte beih tum a nih thu report an dawng lawk nia sawi a ni a, mahse hemi chungchang hi ram hruaitute hi hrilh hriat an ni lo nia sawi a ni bawk.
Deputy defence minister Ruwan Wijewardene chuan Easter Sunday-a bomb tipuaktu mi pakua zinga pakhat chu hmeichhia a nih thu a sawi. Thihchilh bomb tipuaktu zingah hian UK leh Australia-a lehkha lo zir tawh ṭhin pakhat a awm bawk.
Pugoda khuaah bomb puak leh
Nimin khan Sri Lanka khawpui, Colombo khaw chhak lama Pugoda khuaah bomb a puak leh a, mahse thi leh hliam erawh an awm lo. Police thupuangtu Ruwan Gunasekera chuan Pugoda khuaa magistrate court hnunglama ram ruakah bomb hi tihpuah a ni tih a sawi a, police-ten an chhui chiang nghal tih a sawi bawk.