Sudan military council-in inbiakna neih puiah eptute sawm

Suran rama thuneihna chelh mektu, Transitional Military Council chuan an ram president aṭanga Omar al-Bashir paihthlak a nih hnua civil sorkar din thuai tura phut an nih chungchangah eptute chu inbiakna neihpui turin a sawm.

Military Council leh eptu pawl intelkhawm, Forces of the Declaration of Freedom and Change te hi tun hnaiah civil sorkar din dan tur chungchangah an thu a inhmu thei lo nia sawi a ni. Council chuan thuchhuah siamin, Transitional Military Council chu eptute nena inbe tur hian a inhawng reng tih a sawi.

Eptu lam hian civil mite kuta rorelna hlan chhawng thuai turin an phut a, hetihlai hian military council chuan thuneihna inhlanchhawn nan hian kum hnih tal hun a duh dawn niin an sawi thung.

Eptu pawl intelkhawm zingah hian president aṭanga Omar al-Bashir paihthlak a nih theihna atana nawrh huaihawttu ber, Sudanese Professionals' Association (SPA) pawh a tel a, military council-in inbe tura a sawmnaah an tel ve dawn leh dawn loh an la sawichiang lo. Pathianni khan SPA hian council nena inbiakna neih chu an thlawp loh thu an lo sawi tawh a ni.