US-in Myanmar court thutlukna a dem
US chuan Myanmar Supreme Court-in Reuters journalist pahnihte hremna pek a nemngheh sak chu a dem thu a sawi.
Reuters journalist pahnih, Wa Lone leh Kyaw Soe Oo te hi Myanmar sipaiten Rohingya Muslim te an thah chungchang an chhui chian laiin sorkar thuruk kawlah puh an ni a, Official Secrets Act bawhchhiaah puhin kum sarih tang turin hrem an ni. He hremna hi ngaihtuah ṭha turin journalist-te hian Supreme Court-ah hian an ngen a, mahse court chuan an ngenna hi hnawlsakin hremna lo pek tawh hi a nemnghet zawk a ni.
Wa Lone leh Kyaw Soe Oo te hi Rohingya te tihhlum an nih dan an chhui chianna an zawhfel hmain man an ni a, mahse an thawhpui dang pahnihte chuan man an nih hnuah an report hi lo zawhsakin an tichhuak a ni. He report avang hian Reuters chuan Pulitzer Prize for international reporting a dawn phah a ni.
Myanmar Supreme Court chuan journalist-te appeal-na a hnawlna chhan hi a sawilang lo. Mahse US chuan an thubuai ngaihtuah a nih dan te, thiam loh chantir an nih dante chu freedom of expression palzutna leh, Myanmar rama journalist-te himna a ṭhat tawk loh zia tilang chiangtu a ni, a ti.