Scotland First Minister-in independence vote lak rawt

Scotland First Minister Nicola Sturgeon-i chuan kum 2021 hma ngeiin Scotland mipuite chu United Kingdom aṭanga independence an duh leh duh loh chungchanga duhthlanna siamtir an ni tur a ni, a ti.

Nilaini-a Scotland Parliament inkhawma EU Council-in Britain hnenah EU aṭanga inlakchhuahna tur hun a pek October 31 thleng atana a pawhsei chungchang a sawinaah he thu hi a sawilang a ni.

Members of the Scottish Parliament (MSP) te hmaa thu a sawiah, Sturgeon-i chuan Brexit leh Scotland independence chungchangah Scotland mipuite chu duhthlanna siamtir tura hun pek an ni tur a ni, a ti. Scottish Nationalist Party (SNP) hotu Surgeon-i chuan EU aṭanga inlakchhuahna turin October thla thleng hun pawhsei sak ni mah se inremna siam loa EU chhuahsan chu a la hlauhthawnawm reng niin a sawi.

Kum 2014 khan Scotland mipuite chuan UK-a awm chhunzawm duh leh duh loh chungchangah vote an lo thlak tawh a, vote thlak zinga 55.3% chuan UK-a tel zel an duh laiin 44.7% in inlakhran an duh thung. Hemi ṭum hian vote nei zinga 85% zetin vote an thlak a ni.