North Korea-a embassy ṭhenkhat Covid-19 vangin khar lailawk
Tunlai hri leng Coronavirus (Covid-19) vangin North Korea-a foreign embassy ṭhenkhatte chu nimin khan khar lailawk a ni.
North Korea-ah hian hriat theih chinah he hri leng mek kai hi an la awm lo. Embassy-te khar lailawk a nih chhan hi ramchhungah he hri hi a darh palh ang tih hlauh thawn vang a ni. He hri hi ven a nih theih nan North Korea chuan an ramrite a khar a, mi sang tel teh meuh chu North Korea sorkar chuan nasa takin a khuahkhirh zui bawk.
Kar liam ta khan NKorea-in Kangwon leh Chagang province-a mi 3,650 lai a khauhkhirhte uluk taka an hriselna en a nih hnuah a chhuah a ni. Heng zingah hian ramdang mi 221-te pawh telin, an ni pawh hi chhuah an ni zui bawk. Ramdang mi ṭhen khatte hi NKorea khawpui Pyongyang aṭangin Russia-a Vladivostok airport-ah phurh thlen an ni a, he thawlhtheihnaah hian mi eng zat nge chuang hriat chian ni lo mah se, mi 60 vel an chuang nia sawi a ni.
Thla hlui khan NKorea hotupa Kim Jong-Un chuan he hri hian an ram a thlen vaih chuan nasa zawka khuahkhirhna kalpui a nih nghal tur thu a sawi a, ramdang nena inkalpawhna leh an rama khualzin rawn lut duhte chu lut thei loa
siam nghal vek a nih tur thu a lo sawi lawk tawh a ni.
NKorea chuan he natna hri leng do tur hian an ramin duh ang tawka ṭha damdawi leh a hmanrua an neih loh thu tarlangin, tuna an tih theih tawk chu uluk taka lo inven lawk a nih thu an tarlang bawk.
Covid-19 report thar ber
4 Khawvel pumah Covid-19 kai hi mi 110,288 an awm tawh a, ram 100 chuangah a darh tawh.
4 Covid-19 vanga thi mi 3,831 awmin, he hri kai enkawl dam mi 62,393 an awm tawh bawk.
4 Hri kai enkawl mek zinga 38,087 (86%) chu an ngaihtuahawm lo a, mi 5,977 (14%) erawh an dinhmun a
ṭha lutuk lo.
4 Hri darh ṭanna, China ramah chuan a kai thar zat an tlahniam zel a, nimin khan kai thar mi 40 awmin, January thla aṭanga hri kai thar an awm tlem ber ni a ni.
4 South Korea-ah pawh kar hnih chhunga hri kai thar an tlem ber niin, mi 69 in an kai.
4 US-ah chuan hri kai zat hi 500 an chuang tawh.
4 Hri leng mek dona kawnga hma lakna turin China-in WHO hnenah USD maktaduai 20 a pe.