Sudan PM thah tuma beih a ni

Sudan prime minister Abdalla Hamdok chuan nimin khan an ram khawpui, Khartoum-a thah tuma beih a ni a, mahse vanneihthlak takin PM hi a him tih state media chuan a sawi. 

State TV chuan PM-in office a pan laiin a chuanna motor leh a zuitute beih nan bomb tihpuah a nih thu a sawi. Bomb puak hian motor ṭhenkhat a tichhia a, mahse vanneih thlak takin PM leh a hnungzuitute hi an  him thu a sawi. PM hi him lamah hruai nghal a nih thu a tarlang bawk. 

Nikum April thlaa democracy thlawptu lamte nawrna avanga Pre­sident aṭanga Omar al-Bashir paihthlak a nih hnuah Hamdok Prime Minister atan ruatin, civil sorkar a kaihruai a ni. Sorkar thar din a nih hnuah democracy duhtu lam leh sipaite hian inbiakna nei zuiin, nikum August thla khan thuneihna insem zaia sorkar din turin inremna an siam. Kum thum chhunga Sudan-a roreltu tur, sipai leh civil lam aiawh telna, member 11 awmna sovereign council din a ni ta a ni. 

Al-Bashir paihthlak a nih hnuah Sudan ram economy dinhmun hi a chhe zui hle. Thil man a sang chho zel a, an ram hnathawh nei lo, unemployment rate chu 22.1% a tling tawh bawk. Sudan sorkar chaun ṭhalai zinga 30% zet chu hna nei lo an nih thu a sawi.