J&K assembly inthlan chungchang ngaihtuahin high-level meeting ko

President's Rule hnuaia awm mek, Jammu and Kashmir-a assembly inthlan buatsaih a nih theih dan tur ngaihtuahin Election Commission chuan nimin khan Delhi-ah high-level meeting a ko.

J&K Chief Secretary BVR Subrahmanyam, Chief Electoral Officer Shailendra Kumar, Director General of Police, Dilbag Singh leh Home Secretary Sha­leen Kabra-te chuan assembly inthlan hun turte sawipui turin EC team te an hmu a ni. EC chuan hemi chungchanga thutlukna a siam hmain special observer-te ngaihdante a zawt leh phawt ang.

EC hian J&K tualchhung dinhmun enfiah tur hian special observer-te a lo ruat tawh a, an ni hian report pawh an thehlut tawh a ni. EC thupuangtu Sheyphali Sharan chuan observer-te report hi enfiah mek a nih thu a sawi.

Report an thehluhah observer-te hian J&K-a assembly inthlan neih hun turah rawtna pathum an siam. Rawtna an siamte chu June 8-24 inkara inthlan buatsaih te, May 15- June 15 inkara inthlan neih emaw, September 15 hnu lamah emaw inthlan hi neih an rawt a ni.

Nikum June 19-a Mehbooba Mufti-i kaihhruai Peoples Demo­cratic Party (PDP)- Bharatiya Janata Party (BJP) ṭangrual sorkar aṭanga BJP a inhnuhdawh hnuah sorkar siam thei an awm loh vangin Governor's Rule hnuaiah dah a ni. Nikum November 21 khan State Assembly pawh ṭhiah niin, Governor rule hnuaia dah chin, thla ruk a liam hnuah President's rule hnuaiah dah chhunzawm leh nghal a ni.

Supreme Court in a rel dan chuan EC hian Assembly ṭhiah a nih aṭanga thla ruk chhungin inthlan buatsaihna tur a buaipui ṭan a ngai a ni. Hei vang hian J&K-ah pawh hian EC chuan May 20 hma ngeiin inthlan neihna tur hi a buaipui ṭan a ngai a ni.