BJP candidate Thakur-i hnenah notice pathumna pe

27th April, 2019

Election Commison chuan BJP MP candidate Sadhvi Prayga Singh Thakur-i chu Congress hruaitu Digvijaya Singh chungchang a sawinaah 'firfiak' tia a sawi avangin show-cause notice a pe leh a, hei hi Thakur-i hnena notice a pek pathumna a ni.

Ningani-a Madhya Pradesh-a Sehore hmuna election campaign a neihnaah Pragya Thakur-i chuan Digvijaya Singh hi 'firfiak' tia sawiin, firfiak dah bo tur chuan Hindu sakhaw puithiam a ngai dawn niin a sawi. He a thusawi chungchangah hian EC chuan Collector hnenah report thehlut turin a ti a ni.

Kum 48 mi, right-wing activist Thakur-i hi Madhya Pradesh-a Bhopal-a BJP candidate atan ruat a ni a, Madhya Pradesh CM hlui leh Congress veteran Digvijaya Singh nen an inkhing dawn a ni. Candidate atana ruat a nih hnuah sawisel hlawh tak tak thu a sawichhuak fo a ni.

Thakur-i hian 26/11-a firfiakten Mumbai an beih ṭuma thi, Maharashtra Anti-Terrorism Squad chief hlui Hemant Karkare chu anchhia a lawh vanga thi niin a sawi tawh bawk. Thakur-i hi 2008 Malegaon blast case-ah inhnamhnawiha puh zingah a tel a, Hemant Karkare hian ATS hotu a nih laiin he thubuai hi buaipuiin, Thakur-i chuan Hemant Karkare hian a tiduhdah ṭhin hle tih a sawi a, hei vang hian anchhia hi a lawh niin a sawi bawk.

BJP hruaitu hian TV-a interview a neihah kum 1992-a Ayodhya-a Hindu leh Muslim-ten ram inchuh a, Babri Masjid tihchhiat a nih ṭuma a tel ve chu a inchhuang hle tih a lo sawi tawh bawk a ni. Heng a thusawi pahnih avang hian EC chuan show-cause notice a lo pe ve ve tawh a ni.

BJP hruaitu lawkte pawhin Thakur-i hi a thusawi danah fimkhur turin an duh a, Madhya Pradesh chief minister hlui Shivraj Singh ngei pawhin insum turin a ti a ni. Muslim BJP leader Fatima Rasool Siddique-i chuan Thakur-i hi a thusawite avang hian thupha chawi tura a phut thu a sawi. Siddique chuan BJP chu Shivraj Singh Chouhan vanga a zawm thu sawiin, party mi leh sate pawh mi ṭha tak tak an ni a, mahse Thakur-i hian party hmel a tichhe ta a ni, a ti. Bhopal-ah hian May 12-ah Lok Sabha inthlanna hi neih a ni ang.