Mozambique-ah thlipui tleh vangin mi sing tel sawn chhuak
Mozambique ramah thlipui, Cyclone Kenneth tleh vangin mi sing tel chu hmun him lamah sawnchhuah an ni.
Kar ruk liamtaah pawh khan Mozambique-ah hian Cyclone Idai tlehin chhiatna nasa tak athlen a, mi za telin an lo thihphah tawh a ni.
Ningani zan khan cyclone Kenneth hian Mozambique hmarlam chu darkar khata km 220-a nain a nuai a, thlipuiin chhiatna a thlenah hian hriat theih chinah mi pathum an thi .
Mozambique National Institute of Disaster Management (INGC) chuan cyclone tlehna tur kawnga cheng mi 30,000 chuang chu hmun him lamah sawnchhuah an ni tih a sawi a, mi 140,000 te tan ni 15 chhunga ei tur supply thei tur pawhin an inbuatsaih tih a sawi.
UN World Food Programme chuan thlipui tleh hian ruahtui a ken tel avangin ruah a sur nasa dawn a, 600mm chuang ruah a sur rin a nih thu a sawi bawk. Hei hi Cyclone Idai tlehin Beira-a tuilian nasa tak a siam phahna ruahsur aiin a let zetin a tam dawn a ni.
Mozambique ram chanchinah season khat chhunga cyclone ṭum hnih a tleh vawi khatna a ni tih UN thupuangtu Stephane Dujarric chuan a sawi. Ningani zan thli tleh hian kum danga thli tleh an tawrh ngaih lohna hmunte a nuai tel niin UN humanitarin agency chuan a sawi. Heng zingah hian Cabo Delgado province pawh a tel.
UN World Food Programme thupuangtu Herve Verhoosel chuan cyclone Idai tlehna hmun tam taka tuiliante chu kam tawh mah se, infrastructure te a chhiat nasat avangin chhawmdawl hna thawh pawh a chak thei lo niin a sawi. Hetih lai meka thlipuiin a nuai nawn leh avang hian Mozambique ram mipuite dinhmun chu a ṭha lo hle niin a sawi.
Verhoosel hian agency chuan Mozambique hmar lam, Palma leh Mocimboa da Praia khuaa thawn mai theih turin ei tur lam chi metric ton 300 vel chu a buatsaih lawk vek a ni tih a sawi.