Colombia-ah budget tihtlem tum duh loin nawrh huaihawt

Colombia sorkarin education budget leh pension plan thlak danglam a tum avanga lungawi loin nimin khan an ram khawpui, Bogota main square-ah mi tam takin nawrh an huaihawt.

Nawrh huaihawtte hi loneitu pawl, indigeneous group, womens' group, zirlai, Afro-Colombian group, LGBT organisation, unions leh pensioner-te a ni. Anni bakah hian civil society leh FARC political party member te pawh an tel.

President Ivan Duque-an National Development Plan(NDP) a siamah education budget leh pension plan te chu tihtlem a, national security-ah sum tam zawk dah a tum a ni. Hei hi an ram mipui tam takin an duh lo hle. Nimina nawrh huaihawtnaa tel, kum 30 chuang zirtirtu hna lo thawk tawh Virgnia Castro chuan sorkar ruahmanna siam hian education lam a nghawng pawi thei dawn niin a sawi a, hei mai bakah hian health, culture leh sport budget te thlengin tihtlem tum a ni tih a sawi.

Colombia Risk Analysis director Sergio Guzman chuan nimina sorkar laka lungawi lohna lantira nawrh huaihawt chu a bul ṭanna chauh a ni a, hun rei tak nawrh hi kalpui a nih a rinawm thu a sawi.