Kim-an North Korea-a zin turin Putin a sawm

North Korea ram hotu Kim Jong-un leh Russia President Vladimir Putin-te chuan Ningani khan Russia khawchhak lam, Vladivostok-ah summit an nei a, summit an neihnaah hian Kim chuan Putin chu an rama zin turin a sawm a, he sawmna hi Putin pawhin a lo pawm nghal niin Korean Central News Agency chuan a sawi.

Hruaitu pahnihte hian an ram inzawmna tihhmasawnna chung­changte an sawi dun bakah, Korean Pe­ninsula aṭanga nuclear ralthuam tihbo dan turte pawh an sawidun bawk a ni. Trade, economy, science leh technology lamah thawhdunna zau zawk neih pawh an remti dun a ni. Meeting kar lakah hian Kim chuan hun remchangah an ram tlawh turin Putin hi a sawm a ni.

Kim hian nimin chawhnu lam khan a private train hmangin Pyongyang lam a pan leh nghal a ni. Kim hian a ruahman lawk aiin darkar li leh a chanve velin Russia rama a cham hun hi a pawttawi a ni. Russia a chhuahsan hma, nimin zing khan Russian Navy Pacific Fleet bula headquarters a tlawh bawk.