Sri Lanka bomb puaka thi zat puang ṭha leh

Sri Lanka official-te chuan Easter Sunday-a hmun hrang hranga bomb puak vanga thi zat an puanchhuah ennawnin, Ningani khan thi zat hi 253 an ni tih an sawi. Hei hi a hmaa mi 359 an thi nia an lo puan tawh aiin 100 zetin a tlahniam a ni.

Deputy Defence Minister Ruwan Wijerardene chuan pawikhawihna thlenga thi zat a hmaa puan dik loh a nihna chhan chu mitthi dahna in aṭanga data dik tawk lo an pek vang niin a sawi.

Health services director general Anil Jashinghe chuan thi zat dik tak hi hriatchian a har a, 250 emaw 260 emaw vel a ni thei tih sawiin, bomb puahna hmunah hian taksa peng darh eng emaw zat a awm avangin thi zat dik tak hriat mai hi a la har niin a sawi bawk.

Defence Secretary Hemasiri Fernando chu pawikhawihna thleng an dan theih loh avangin a bang-a, hemirual hian India aṭanga pawikhawihna thlen tum an awm thu intelligence report an dawn chu an theih anga an bawhzui nghal thu a sawi. Pawikhawihna rapthlak tak thlengah chuan mawhphurhna lain a bang tih a sawi a, mahse a hma lakna kawngah tih dik loh a neih loh thu a sawi nghal bawk. Police hotu lu, IGP Pujith Jayasundara pawh a bang bawk a ni.

Police-te chuan nimin khan pawikhawihna thleng nena inhnam­hnawihna neia puha man tuma an zawn, mipa pali leh hmeichhe pathumte thlalak an tichhuak.

Islamic State (IS) firfiak pawl chuan Sri Lanka-a bomb tipuaktute chu an pawl mi leh sa niin a sawia, thihchilh bomb tipuaktu nia a sawi mi pariat te lanna video pawh a tichhuak. Mahse he video-ah hian pakhat chauhin a hmel tilangin midangte chuan an hmai an tuam vek a, IS flag hnuaiah dingin an hotu Abu Bakr Al-Baghdadi lakah rinawmna thu an tiam lai tihlan a ni. Sri Lanka sorkar chuan bomb tipuaktu hi mi pakua niiin an zinga pariat chu hriatchian an ni tawh tih a sawi a, hmeichhe pakhat a tel bawk a ni.