Brazil-ah ni khatah Hripui vanga thi 4,000 chuang awm

Brazil ramah Thawhlehni khan Covid-19 hri vangin mi 4,195 an thi a, hripui a len hnua an rama ni khata hri vanga thi an tam ber ni a ni.

US dawtah Brazil hi Covid-19 vanga thi tamna ber dawttu niin, hripui vanga thi hi mi 3,37,000 an tling tawh a ni. March thla chhung bik khan hri vanga thi hi mi 66,570 an awm. Hri kai hmuh chhuah hi maktaduai 13 chuang an awm tawh bawk. Hri leng a hluar chhoh leh avangin dam­dawi-inte an khat leh tawh hle.

Hetih lai hian president Jair Bolsonaro chuan hri leng vangin lockdown puan chu a la duh lo chhunzawm zel. Lockdown puana an ram economy a chhiat phah dan tur chu hri leng aiin a pawi zawk dawn tih a sawi a, tualchhung thuneituten an biala khuahkhirhna an siamte pawh hlih a nih theihna atan court-ah a thlen mek a ni.

Thawhlehnia thu a sawiah President Bolsonaro chuan khuah­khirhna leh inkhunghranna tur thupek siamte chu sawiselin, heng hian thau lutukna leh depression thlengin a thlen thei a ni, a ti. Hripui vanga thi zat chungchang erawh engmah a sawilang lo thung.

Health institute Fiocruz chuan Brazil ramah hian coronavirus hri chi hrang 92 zet hmuh a ni tih sawiin, heng zingah hian Brazil variant tih, P.1 pawh a tel a, hei hi darh chak leh inkaichhawn awl tak niin a sawi. He hri chi hran hi nikum November thla khan hmuh chhuah niin a darh chak hle a, kumin January thleng khan hri kai thar zinga 73% chu he hri kai hi nia sawi a ni.

State tam zawkah damdawi-ina ICU khum 90% chu Covid-19 hri kaiten an luah a, state tam takin oxygen supply an tlachham ṭan tih an sawi bawk. Heti chung hian khawpui leh state eng emaw zat chuan hri leng vanga khuahkhirhna siamte chu an thlahdul mek thung. Hei hi President-in lockdown a thlawp loh em avang leh, lockdown puan a ṭul loh thu a sawi rengin a nghawng niin Institute for Healh Policy Studies-a executive director Miguel Lago chuan a sawi.