Myanmar sipaiten mi panga kaphlum leh

Myanmar sipaite chuan nimina an ram hmar thlang lam, Kale khuaa sipai rorelna duh lohna lantira nawrh huaihawtte chu an pawng kah leh a, mi panga an kaphlum a, mi dang eng emaw zatin hliam an tuar.

Sipaite kut tuarin civil sorkar dah let leh phuta nawrh huaihawt zinga mi 580 chuang an thi tawh a, sipaiten silai leh hmanraw danga nawrh huaihawtte an bei let reng chungin khawpui hrang hrangah mipuiten sipai rorelna duh lohna an lantir chhunzawm reng tho a ni.

Nawrh huaihawtnaa bultumtu leh a tam ber hi ṭhalai an ni a, social media kaltlanga campaign an neih bakah information inpekna atan an hman ṭhin. Mahse sipai sorkar broadband wireless internet leh mobile data service a tihtawp avangin inbiakpawhna kawngah harsatna an tawh nasat phah hle. Fixed-in line service erawh hman theih a la ni a, mahse a hmang thei hi mi tlem te chauh an ni.

CHINA factory a kang
Yangon khawpuia Chinese-invested clothing factory chu nimin zing khan a kang a, thi leh hliam erawh an awm lo.

Factory official-te chuan kangmei hi factory luhna bul aṭanga inṭan niin an sawi a, zing dar 5:35 velah kang ṭanin, dar 6:55 ah ṭhelh mih a nih thu an sawi. Kangmei chhuah chhan hi hriat a ni lo a, chhui mek a ni tih an sawi bawk.

Official-te chuan kangmei chhuakin a kan chhiat hlut zawng hi yan maktaduai riat (USD mtd 1.223) hu niin an sawi.

Myanmar sipaiten civil sorkar thuneihna hnehchhuh a, sipai rorelna duh lohna lantira mipui nawrh huaihawtte silai leh hmanraw dang hmanga an beih let chungchangah ram hrang hrangte chuan an dem thu an sawi tawh a, Myanmar sipai hotute leh an thawhpuite hrekna pawh ram eng emaw zatin an lo siam tawh bawk.

Hetih lai hian China chuan a demna lam thu a la sawi lang lo a, Myan­­mar rama buaina thleng mek chu a ram chhung thil a ni tiin a la inthiar­fihlim a ni. Hei vang hian sawisel pawh a hlawh hle a, tun hnaiah Yangon-a China company eng emaw zat chu beih leh rawkte a lo ni tawh a ni.