Netanyahu-a'n thubuai ngaituah hun sawn hla turin ngen

Israel prime minister Benja­min Netanyahu chuan eiru a puhna thubuai a neih mek, Jerusa­lem District Court-in March 17-a ngaihtuah a tum chu sawn hla turin Pathianni khan a ngen. 

He ngenna hi Netanyahu-a lawyer Amit Hadad chuan State Attorney Office-ah a thlen a ni. Sawn hlat an ngenna chhan hi Netanyahu-a an puhna thubuaia lehkha pawimawh chu technical thil avangin defence team-ten an la hmuh kim loh vang a ni. Attorney Office-ah Netanyahu thubuai ngaihtuah hun tur chu Hadad chuan ni 45 a tan tihkhawitlai sak turin ngenna a siam a ni.     

Israel tualchhung chan­chinbu Ha’aretz chuan State Attorney Office-in Netan­yahu-a an puhna thubuaia lehkha pawimawh chu hard copy-a siam vek an tum thu a tarlang a, mahse Netanyahu-a defence team-te chuan he lehkha pawi­mawh hi scan-a digital copy chauha nei turin a hriattir thung.   

Kum 70 mi Netanyahu hi thamna la, a thuneihna dik lo taka hmanga hlawkna telna leh amah thlawptu mi hausate hnen aṭanga thilpek hlu tak tak dawngah puh a ni. Kum thum chhung an chhui hnuah nikum khan Attorney General Avichai Mandelblit chuan Netanyahu laka hian thubuai hi a siamsak ta a ni.