Trump-a'n WHO nena inlaichinna titawp
United States (US) president Donald Trump chuan World Health Organisation (WHO) leh US inlaichinna chu a titawp vek dawn tih a sawi.
Khawvela hripui, Covid-19 leng mek chungchangah President Trump chuan WHO chu a mawhphurtuah China a ngai duh lo nia sawiin, "China hian WHO hi a thunun pumhlum tawh a ni", tiin a sawi.
WHO nena an inzawmna a tihchat chuan he pawl tana US-in sum a lo pek ṭhin chu pawl dangah pek a ni tawh zawk dawn a ni, a ti.
Trump-a thusawi chungchang hi WHO lam chuan a la chhang lo a, mahse European Union chuan a thutlukna siam chu ngaituah ṭha leh turin a ngen tawh a ni. US-in WHO nena inzawmna a tihtawp chuan khawvelin hripui leng mek a dona kawngah nghawng a nei dawn tih an sawi.
US hi WHO tana sum thawhtu ram lian ber a ni a, kum 2019 khan US dollar maktaduai 400 pein, hei hi WHO budget pumpui aṭanga 15% a tling pha a ni.
G7 summit
sawn hla dawn
President Trump chuan Juen thlaa G7 summit neih tur chu a sawn hla dawn tih a sawi. Meeting neih hunah hian India, Russia, South Korea leh Australia ramte sawm a tum tih a sawi bawk.
G7 summit sawn hun tur hi sawichiang lo mah se, Trump chuan September thlaa UN General Assembly neih hma emaw, neih zawh hnuah emaw a ni ang, a ti.
Hripui leng vangin G7 member ramte hian June thla hian video conference hmangin summit hi neih an tum a, mahse sawn a ni leh dawn ta a ni. Meeting-ah hian economy lama thawhhona chungchangte sawiho a ni ṭhin.
US-ah hri kai
pun belh zel
Covid-19 kai chu khawvelah an la pun belh zel a, US chu hri kai leh hri vanga thi tamna ber ram a la ni chhunzawm zel.
US-ah hian hri kai hi mi 17,69,776 an awm tawh a, an zinga mi 1,03,758 in an thihpui tawh a ni. Inrinni bikah khan he hri vanga thi hi mi 960 an awm.
Khawvel pumah hri kai hi mi 61,75,099 an awm a, mi 3,71,228 in an thihpui tawh. Hri kai zinga mi 27,44,481 chu enkawl dam an ni tawh thung. Hri mek zinga 98% chu an dinhmun a ngaihtuahawm lo nia sawi a ni.