Court-in Pakistan PM hlui Nawaz Sharif man turin thupek chhuah

Kar liam ta Zirtawpni khan Pakistan-a Accountability Court chuan an ram prime minister hlui Nawaz Sharif chu court-a a inlan loh avangin manna tur thupek a tichhuak.

Nawaz Sharif hi a hriselna dinhmun a ṭhat loh avanga nikum lama London-a inenkawl tura a kal chu a la cham reng a ni. 

Kar liam ta Zirtawpni khan Pakistan khawpui Islamabad-a Accountability Court-ah car man to leh ramdang aṭanga thilpek a dawn dan dik lo chungchangah Nawaz Sharif leh midang pathum Asif Ali Zardari, Khawaja Anwar Majeed leh Abdul Ghani Majeed-te chu an thubuai ngaihtuah a ni. 

Court-ah hian Pakistan president hlui Asif Ali Zardari leh PM hlui Sharif hi an inlan ve lo a ni. Zardari hian court-a a inlan loh chhan hi court a hriattir a, mah se Sharif hian a kal loh chhan a hriattir ve loh avangin court chuan man theihna thupek a tichhuak ta a ni. 

June 11-ah Accountability Court chuan an thubuai hi a ngaihtuah leh ang.