Spain ram inthlanpui neih a ni

Spain ram inthlanpui chu nimin khan neih a ni a, hei hi kum 2015 hnua inthlanpui an neih ṭum thumna a ni.

An ram huna nimin zing dar 7 aṭangin vote thlak ṭan a ni a, zan dar 6 thleng hun hawn a ni. Nizan vek khan inthlan result hi puan hman beisei a ni bawk.

Nikum June thla khan Pedro Sanchez leh a party, Socialist Party chuan Par­liament vote hmangin con­servative Popular Party hruaitu Mariano Rajoy chu prime minister aṭangin an paihthla a ni. Rajoy hi Spain hruaitu zingah parliamentary vote hmanga PM nilai paihthlak hmasak ber a ni. Amah thlaktu turin Sanchez chu prime minister atan lakluh a ni a, Popular Party chuan an hruaitu atan Pablo Casado an thlang nghal bawk.

February thla khan Sanchez chuan Parliament-ah a national budget chu eptu pawl lamin an hnawlsak hnuah April 28-ah inthlanpui neih a nih tur thu a puang a ni.

Parliament-ah hian Sanchez-a party, Socialist Party hian seat 350-a seat 84 chauh a nei pha a, a hmaa thlawptu Catalan lawmaker-te chuan a budget plan avang hian an thlawpna an hnukkir bawk a ni.

Inthlan neih hmaa mipuite ngaihdan lak hnuhnung berah chuan party lian panga-te chuan Pathianni-a vote tla aṭanga 10% vel ṭheuh chu an hmuh phak rin a ni. Socialist Party chu party mala seat la hnem ber tura rin ni mah se, majority nei tura ngai zat sat 176 erawh an neih phak rin a ni lo thung.