Sudan military leh eptuten joint council siam remti

Sudan rama thuneihna chelh mektu, Military Transitional Council (TMC) leh eptu pawl intelkhawm, Declaration of Freedom and Changes Forces chuan inthlanpui buatsaih a nih hma chu an pawl pahnih telna, joint council siam an remti.

TMC leh eptute hian a thuphungin inremna hi siam tawh mah se, an inrem dan kimchang erawh tarlan a la ni lo a, an la inbe chhunzawm mek a ni.

Inremna an siamah hian sipai lam chuan joint council-ah member 10 dah a, an zinga pasarih chu sipai lam aiawh leh civil lam aiawh pathum dah an duh a ni. Hetihlai hian eptu pawl lam chuan member 15 dah an duh thung a, civil lam aiawh member pariat leh sipai lam aiawh pasarih dah an rawt ve thung a ni.

Military council thu­puangtu Shams Eldin Kabashi chuan boruak zángkhai tak hnuaiah inbiakna hi an neih theih thu a sawi a, inremna ṭha tak an siam theih ngei a beisei thu leh, mipuite hnenah pawh puanzar thuai theih a nih a beisei thu a sawi.

March 11-a president aṭanga Omar al-Bashir paihthlak a nih hnu khan Mi­litary Council hian thu­neihna an chang zui a, hetihlai hian eptu lam chuan a rang thei ang bera civil sorkar din turin an phut thung. Mahse sipai lam chuan civil mite kuta sorkarna hlan tur chuan kum hnih vel a ngai dawn niin an sawi a ni.