Spain inthlanah rorellai PSOE-in seat la hnem ber

Pathianni-a Spain ram Parliament inthlanpui neih zawh takah rorellai, Spanish Socialist Workers' Party (PSOE) chuan seat a la hnem ber a, mahse party malin majority a nei pha lo.

PSOE hian Parliament seat 350 awmah seat 123 a la a, mahse majority nei tur chuan seat 176 neih phak a ngai a ni.

PSOE hruaitu leh Prime Minister Pedro Sanchez chuan an party-in vote tla aṭanga 30% vel zet a hmu pha chu lawm­awm a tih thu sawiin, an ram mipuite lawmthu a hrilh. A kaihhruaina hnuaiah pro-Euro­pean government an din dawn tih a sawi bawk.

Inthlanah hian PSOE khing­pui ber, People's Party (PP) chuan seat 66 chauh a la pha a, inthlan hmasaa a lak zat seat 71 a pha tawh lo hle. PP hruaitu Pablo Casado chuan an party chu Spain-a eptu pawl leh centre-right hruaitu an la ni chhunzawm zel dawn tih a sawi.

Citizens chuan seat 57 lain inthlan hmasa aiin seat 25 in a la hnem zawk a, Vox chuan seat 24 a la bawk. Oriol Junqueras kai­hruai Catalan Republic Left (ERC) chuan seat 14 a la bawk.