Sorkar ruahmanna siam duh loin Hong Kong-ah nawrh huaihawt

Hong Kong Parliament-in pawi­khawihnaa inhnamhnawiha rinhlelh, criminal suspect-te an thubuai ngaih­tuah tura mainland China-a thawn an nih theihna tur, extradition rules siam a rawt chu mipuite chuan duh loin Pathianni khan Parliament bulah nawrh an huaihawt.

Pathiannia nawrh huaihawtnaa tel tam tak hian kum 2014-a democracy thlawptuten nawrh an huaihawt ṭuma an tihdan angin nihliap eng (yellow) an khum leh a ni. Kum 2014-a nawrh huaihawtnaa hruaitute chu manin thla 16 chhung lung-in tantir an lo ni tawh a ni.

Nawrh huaihawtte hian Causeway Bay leh Wanchai district-ah kawng an zawh a, darkar thum chuang zet kawng an zawh a ni. Hemi hnu hian Legislative Council leh sorkar headquarters pawn lamah an awm zui bawk.

Police-te chuan nawrh huaihawtnaa telte hi mi 22,800 vel niin an sawi a, mahse a buatsaihtute erawh chuan mi 1,30,000 vel an tling niin an sawi thung. Kawngzawhte hian thuziakte kengin, Hong Kong leader Carrie Lam chu Hong Kong hralhtuah puhin, bang turin an phut.

Sorkarin extradition rules siam a rawtna hi Parliament-ah a dodaltu tur pro-democracy lam an tlem vangin dan-ah chantir a nih ngei rin a ni.