Sri Lanka-in hmai khuhna hman khap
Sri Lanka sorkar chuan Easter Sunday-a an rama firfiak pawikhawihna thlen hnuah vantlang hmuna hmai khuhna hman a khap a, hei hian Muslim hmeichhiate hmai khuhna burka pawh a huam vek dawn a ni.
President Maithripala Sirisena chuan Pathianni khan he thupek hi tichhuakin, an ram himna an ngaihtuah avangin he thupek hi siam an nih thu a sawi. President chuan mi tupawhin, an hmelhmai hriat harsa khawpin an hmai an khuh tur a ni lo, a ti.
Sri Lanka-ah hian Muslim hi 10% vel an awm a, minority zingah Hindu dawta tam ber an ni. Kristian hi 7% vel an awm bawk.
Easter Sunday-a Sri Lanka-a biak-in leh luxury hotel hrang hranga bomb puah vanga thi chu mi 253 an ni a, Islamic State (IS) chuan an pawl tih niin chhal mah se Sri Lanka sorkar chuan an rama Islam firfiak pawl, National Thowheeth Jamaath (NTJ) chu mawhphurtua puhin dan pawnah a hnawl tawh a ni. Pawikhawihna thlenga inhnamhnawiha rinhlelh mi 106 man an ni tawh bawk. Man zingah hian Syria leh Egypt mite pawh an tel.
Sri Lanka police-te chuan Pathianni khan Kattankudy-a NTJ headquarters dapin, mi pakhat an man. Mahse an mi man chungchang hi an sawichiang duh rih lo.