ULFA-I in an pawl mi pathum that
Assam hel pawl United Liberation Front of Assam-Independent (ULFA-I) chuan an pawl mi pathum chu Myanmar-a an camp pakhat aṭanga tlanbo an tum avangin Myanmar-ah an that nia sawi a ni.
An mi thah nia tarlan te hi Lalit Asom, Ashwini Asom leh Rhino Asom aka Rubul Moran-te niin an camp aṭanga tlanchhiat a security force-te kuta inpek an tum nia sawi niin kar liamta Ningani-a intelligence-te thudawnna chuan a sawi.
Indian Army chuan kar liamta Nilaini khan Arunachal Pradesh-ah ULFA-I pawl ami Mridul Mahanta an man a, thu an zawhchianna aṭangin an pawl mi pathum thah an nih thu hi an hria nia tarlan a ni. Top Intelligence office chuan he thil thleng hi ni 20 chuang liam tawh a mi kha a nih thu sawiin ULFA-I in an thah pathumte hi Myanmar-a Sagaing region-a Ta Ga area aṭangin an tlan bo a, international border kan a security force-te hnena inpek tum an nih thu leh Niliguri Gut camp area-ah man leh an nih thu a sawi. Man an nih hnu hian ULFA(I)commander-in-chief Paresh Baruah hnen aṭanga pawmpuina an hmuh angin thah an ni ta niin a sawi bawk.