UK-a Myanmar embassy-ah Ambassador luh an phalsak lo
UK-a Myanmar ambassor Kyaw Zwar Minn chuan Nilaini zan khan embassy-a a luh phalsak a nih loh avangin a car-ah a riak niin a sawi.
Myanmar sipaiten an rama civil sorkar thuneihna an hnehchhuh leh, nawrh huaihawtte chunga sipaite chet dan rawng tak chu Kyaw Zwar Minn hian a hmain a lo sawisel tawh a, hei vang hian sipai sorkar hian an ram ambassador a nihna aṭangin ban tih a sawi a, embassy staff-te pawh sipaite hian building chhuahsan turin an ti niin a sawi bawk.
Kyaw Zwar Minn chuan UK sorkar hnenah Myanmar sipai sorkarin ambassador a ruat thar chu pawm lo turin a ngen. Sipaiten hian Kyaw Zwar Minn an ban hnuah deputy ambassador Chti Win chu charge la turin an ti nia sawi a ni a, mahse UK foreign office chuan ambassador thlak chungchangah official notification an la dawn lo tih a sawi thung.
Celebrity model Paing Takhon an man
Sipai rorelna duh lohna lantira mipuite nawrh huaihawt thlawptu, celebrity eng emaw zat manna thupek sipaiten an chhuah hnuah, Myanmar rama model leh actor lar ber zinga mi Paing Takhon chu an man ve leh ta.
Kum 24 mi, Paing Takhon hi sipai rorelna duh lohna lantira kawtthlera nawrh huaihawtnaah pawh a tel nasa a, social media lamah pawh sipai sorkar duh lohna leh democracy thlawpna a tarlang nasa hle.
Sipaiten an man hnuah Takhon-a instagram leh a Facebook account-te pawh an tihtawp sak nghal nia sawi a ni. A mobile phone pawh an laksak nghal a ni.
Takhon-a farnu, Thi Thi Lwin chuan an ram huna nimin zing dar 5 vel khan sipai motor pariat hmangin, sipai 50 vel chu Yangon-a North Dagon-a an inah kalin a nuṭapa hi an rawn man niin a sawi. An man lai hian Takhon hi a dam ṭha lo hle a, kal pawh a kal ṭha thei lo nia sawi a ni bawk.
Sipaite hian kar tir lam khan Myanmar rama comedian hriat hlawh ber pawl, Zarganar an lo man tawh bawk a ni.