US-in Palestinian ṭanpuina $mtd 235 pe leh tawh dawn

US President Joe Biden kaihhruai sorkar chuan Donald Trump hunlaia Palestinian ṭanpuina pek ṭhin tihtawp tak US dollar maktaduai 235 chu an pe leh tawh dawn.

Pawisa an pek tur hmun thuma ṭhena hmuh hnih hi United Nations Relief and Works Agency for Palestine Refugees (UNRWA) hnenah pek a ni ang, UNRWA hian kum 2018-a US-in US dollar mtd 360 a pek tur a hloh hnuah khan sum lamah harsatna nasa tak a tawk zui a ni.

US Secretary of State Antony Blinken chuan US ruahmannaah chuan dollar mtd 75 chu economic leh hmasawnna hna thawhna atan a ruahman tih sawiin hei hi West Bank leh Gaza tan bik a ni dawn a, US Agency for International Development (USAID) kaltlangin remna leh muanna a awm theihna atan dollar mtd 10 chu pek a nih dawn bawk tih leh UNRWA hnenah dollar mtd 150 pek a ni dawn tih a sawi.

Thla hmasa lamah khan US hian West Bank leh Gaza-a ei tur nei lote leh Covid-19 vanga harsatna tawkte tan dollar mtd 15 a pek dawn thu a lo puang tawh bawk.

UNRWA Commissioner General Philippe Lazzarini chuan US nena an thawkdun leh tur a lawm hle tih sawiin, Middle East-a raltlante chhawmdawlna kawnga kan thawkdun leh tur hi thu lawmawm tak a ni, a ti.