Inremna siam loin Trump-Kim summit zo

US President Donald Trump leh North Korea hotu Kim Jong-un ten Vietnam khawpui, Hanoi-a ni hnih awh summit an neih chu nimin khan an zo ta.

Ram pahnih hruaite hian North Korea aṭanga nuclear ralthuam tihbo dan tur leh an ram economy chungchangah inbiakna ṭha tak nei mah se, inremna erawh an ziak lo. White House thupuangtu Sarah Sanders chuan thuchhuah siamin, Trump leh Kim hian inremna ziak loin summit hi an titawp a, mahse an team ve ve te chu an la inhmu leh dawn a ni, a ti.

Trump leh Kim hian Nilaini tlai khan meeting vawi khatna chu minute 20 chhung vel neiin, an ṭhuihruaite nen zanriah an kilho nghal a ni. Nimin khan meeting hi an chhunzawm leh a, mahse inremna engmah siam loin an titawp leh a ni. Hei vang hian a hmaa lo ruahman lawk, meeting zawhah hruaitu pahnihten joint signing ceremony neih tura tih pawh ṭhulh a ni bawk.

Donald Trump chuan US in NKorea a hrek mekna hlih chungchangah an ngaihdan a in an theih loh avangin inremna an ziak thei ta lo niin a sawi a, NKorea ram hian an ram hrekna zawng zawng chu hlih vek an duh a, mahse hei hi an ti thei rih lo tih a sawi. Hemi rual hian Hanoi-a Kim nena meeting an neih chuan rah ṭha tak a chhuah ngei a beisei thu sawiin, ram pahnihte hian NKorea nuclear ralthuam tihbo chungchangah inremna an la siam theih ngei a rin thu a sawi.

Hruaitu pahnihte hian an inbiaknaah hian NKorea khawpui, Pyongyang-a US office chungchangte pawh an sawidun a ni. Kim chuan an rama US office hawn a nih theihna atan an inhawn thu leh, nuclear ralthuam tihbo pawh ṭha a tih thu a sawi. Hei hi duh lo ni se chuan US President hmu tur hian Vietnam-ah a kal lo ang tih a sawi.

US Secretary of State Mike Pompeo pawhin hruaitu pahnihte chuan inremna ziak thei lo mah se, ram pahnihte chuan inremna hi an la siam theih ngei a rin thu a sawi. Hemi atan hian hma pawh an la chhunzawm zel dawn tih a sawi.