UNSC-ah global terrorist-a Masood Azhar dah rawtna thehlut

United Nations Security Council (UNSC)-ah Jaish-e-Mohammed (JeM) hotu Masood Azhar global terrorist-a puang tura rawtna chu Nilaini khan France, Britain leh France chuan an thehlut.

UNSC permament member pathumten rawtna an thlen hi Russia pawhin a thlawp dawn a, mashe a hmaa hemi chungchanga rawtna lo siam tawh lo dangtu, China chuan a lo dang leh dawn em tih hriat a ni lo.

Security Council Sanctions Committee chuan member pathumte rawtna thleng hi ni 10 chhungin an ngaihtuah dawn a ni. UN designated global terrrorist-a Azhar dah rawtna hi pawm a nih chuan chuan Azhar hi a ramdanga a zinchhuah khapsak a nih bakah a thil neihte pawh khawih chet theih loa hreksak a ni dawn a, ralthuam lama sumdawnnaah pawh khuahkhirh a ni ang.

Pakistan-a inkhuar, JeM hian kumin February 14 khan India rama Pulwama district-a Central Reserve Police Force (CRPF) convoy beiin, thihchilh bomb an tihpuahah sipai 40 an thi a ni. Hetihlai hian he firfiak pawl hotu, Masood Azhar hi Pakistan sorkar chuan an ram chhunga zalen taka a awm a phalsak reng a ni.

Mazood Azhar-a kaihhruai JeM hian India ramah pawikhawihna an thlen fo a, kum 2001 khan Indian Parliament an bei a, 2016-ah Pathankot airbase beiin, 2016-ah Uri leh kuminah Pulwama-ah te pawihkhawina an thlen tawh bawk .

Kum 2009 khan India chuan Azhar hi UN-desiganted global terrorist-a puang turin a rawt tawh a, hmei hnu kum 2016-ah khan ram pathum - US, UK leh France leh UN hnuaia 1267 Sanctions Committee-ah rawtna an thehluh leh bawk. Kum 2017 khan US, UK leh France hian a hranin rawtna hi an thehlut leh a, mahse heng rawtna thlente hi China chuan permanent membert-in veto power an neih hmangin a lo dang zel a ni.