US-in Osama fapa Hamza lu manah dollar mtd khat phal

United States chuan al-Qaida firfiak pawl hotu hlui, Osama bin Laden-a fapa, Hamza Bin Laden awmna chin hrilh thei hnenah lawmman, US dollar maktaduai khat pek a tiam.

Hamza Bin Laden hi a awmna chin hriatchian a ni lo a, Afghanistan leh Pakistan ramri bul velah a awm nia sawi a ni. Hun eng emaw chen aṭang khan audio leh video message te tichhuakin, an pa an thahsak avanga phuba la tura an pawl mi leh sate fuihin, US leh a thurualpui khawthlang ramte bei turin a fuih ṭhin a ni.

Kum 2011 khan US special force te chuan Osama bin Laden hi Abbottabad, Pakistan-ah an lo kaphlum tawh a ni. Osama bin Laden hi kum 2001, September 11-a al-Qaida firfiakten US an beihnaah a mawhphrutu bera puh a ni. Firfiakten New York-a World Trade Center Tower an beihnaah hian mi 3,000 dawn an thi a ni.

US sipaiten Osama bin Laden an thah hnuah a in aṭanga document an lakah, bin Laden hian amah thlaktu atana a fapa te zinga a duh ber, Hamza bin Laden buatsaih a tum dan lam hawi thuziakte pawh a awm a ni.

Osama fapa, Hamza bin Laden hi kum 30 mi vel nia hriat a ni a, US chuan kum hnih liamta khan global terrorist-ah a lo dah tawh a ni. Kum 2001-a World Trade Centre tower sutna atana hman thlawhtheihna hijack-tu zinga pakhat, Mohammed Atta-a fanu chu nupuiah a nei a ni.

Assistant Secretary for Diplomatic Security Michael Evanoff chuan Hamza awmna tak hi an hriatchian loh thu a sawi a, Afghan-Pakistan ramri velah awmin Iran lam a la pan an rin thu a sawi.