UNSC-in Venezuela chungchanga draft resolution siam hnawl

United Nations Security Council (UNSC) chuan US leh Russia-in a hrana Venezuela chungchanga draft resolution an siam chu a hnawlsak ve ve.

Ningani-a member 15 awmna UNSC-in vote a laknaah US draft resolution siam hi a thlawp lamah vote kua a tla a, a duh lo lamah vote thum a tla a, member pathum an hai thung. Russia, China leh South Africa chuan an hnawl a ni.

Hemi hnu hian Security Council chuan Russian draft-ah hian vote a la leh a, a thlawp lamah vote li, thlawp lo lamah vote sarih tlain, member pali-in vote an thlak lo bawk.

US draft-ah hian Venezuela ram mipuite dinhmun chhe zel tur venna tura hma lak thuai a ṭul thu te, Venezuela rama chhawmdawlna mamawhte hnenah ṭanpuina pek thuai a tul thute a tarlang. Hetihlai hian Russian draft-ah chuan ram pawn lam aṭanga Venezuela-a chhawmdawlna pek tur chu Venezuela sorkar remtihna anga kalpui a rawt thung. Hei bakah Venezuela ramchhung buaina tawh mek chu boruak ṭha tak hnuaia chinfel dan kawng zawn a ṭul thu a sawi bawk.

Ningani-a UNSC meeting hi Venezuela chungchang avanga thla khat chhunga council meeting neih ṭum thumna a ni.

China chuan Venezuala ramchhung inrelbawlnaa ramdangte inrawlh chu a thlawp lo a, hei bakah sipaite tirh luh pawh a dodal bawk.

Kumin January 23-a National Assembly President leh eptu hruiatu Juan Guaido-a'n an ram interim president-a a inpuan hnu leh, hei hi US bakah a thawhpui ram dang eng emaw zatin an pawm thu an sawi hnuah - sVenezuela tualchhung politics hi a buai zual a ni. President Nicolas Maduro chuan mipuite an ram hruaitu atana dan ang taka an thlan a ni tih sawiin, Guaido thlawptu US nena an inlaichinna te a tichat vek a, hei bakah hian Brazil leh Colombia ramrite a khar bawk.