Britain-in Myanmar ambassador hlui a awm zui phalsak
Britain sorkar chuan Myamnar sipaiten an ban tak leh embassy-a pawh luh an phalsak loh, Myanmar ambassador hlui Kyaw Zwar Minn chu an rama awm chhunzawm zel a phalsak.
Britain foreign office chuan London-a ambassador chunga Myanmar sipaite chet dan chu an dem hle tih a sawi a, Kyaw Zwar Minn-a'n huaisen taka sipai rorelna dodaltu, Myanmar mipuite tana aw a chhuah chu an zah hle tih a sawi bawk. 'Minn laka sipaite chet dan rawng tak kan hmuh hian, United Kingdom-a him takin a awm zel thei tih kan tiam duh a ni," a ti.
Minn chuan London-a Myanmar embassy chu an rama sipai rorelna thlawptute chuan lain, amah ngei pawh a chhunga lut thei loin an siam tih a sawi a, embassy staff-te pawh building chhuahsan tura hriattir an ni tih a sawi.
An ramin harsatna a tawh mekah ṭanpui turin ram dangte a sawm a, ram dangte puihna lo chuan an ram buaina tawh mek chu an chingfel thei dawn lo tih a sawi. March thla khan Minn hian nawrh hauihawtte chunga sipaite chet dan rawng tak a dem thu leh, sipaiten an hren mek an ram hruaitu Aung San Suu Kyi leh president Win Myint chhuah tura a phutna thuchhuah a siam a ni.
Britain foreign secretary Dominic Raab chuan social media lamah Minna thlawpna thu hi ziakin, UK sorkar chuan Myanmar rama thisen chhuahna thleng titawp tur leh, democracy tungding leh tura a phut thu a sawi. Hemi rual hian Myanmar thuneitute chuan official-in ambassador Kyaw Zwar Minn ban a nih thu leh, charge d'affaires atan deputy ambassador Chit Win ruat a nih thu a hriattir tawh a, hei hi lo pawm mai loh chu tih theih dang a awm lo tih a sawi bawk.
US-in Myanmar hrekna siam belh
US Treasury Department chuan Ningani khan Myanmar sorkar hnuaia gem company hrekna a siam belh leh.
Myanmar rama jade leh lunghlu dang laihchhuah leh zawrhchhuah chungchang buaipuitu, Myanmar Gems Enterprise (MGE)-in US-a thil a neihte chu khawih chet theih loha hrek sakin, transaction a tih pawh khapsak a ni. MGE hi sipai sorkarin sum a hmuhna pui ber pakhat nia sawi a ni.
US secretary of state Antony Blinken chuan Myamnar rama democracy sorkar tundin a ni leh a, ram chhung boruak ṭha a awm theihna turin US chuan theihtawp a chhuah zel dawn tih a sawi. US hian a hmain Myanmar sipai hotu leh an chhungte bakah sipai nena inzawmna nei company ṭhenkhat hrekna a lo siam tawh a ni.
Extractive Industries Transparency Initiative-in a tarlan danin, kum 2017-18 khan Myanmar hian jade leh lunghlu emporium kaltlangin US dollar maktaduai 980 man a hralh chhuak a ni. Mahse hripui leng vangin nikum chhung khan gem emporium hi titawp lailawk a ni.